ಕುಷ್ಟಗಿ: ವಿಚಿತ್ರ ಕಾಯಿಲೆಗೆ ಮೂರು ಜಾನುವಾರು ಸಾವು

ಸುದ್ದಿಮೂಲ ವಾರ್ತೆ

ಕುಷ್ಟಗಿ, ಏ.13: ತಾಲೂಕಿನಲ್ಲಿ ಕಳೆದೆರಡು ದಿನಗಳಿಂದ ವಿಚಿತ್ರ ಕಾಯಿಲೆಯಿಂದ ಬಳಲುವ ಜಾನುವಾರುಗಳು ಇದ್ದಕ್ಕಿದ್ದಂತೆ ಮೃತಪಟ್ಟಿವೆ ಎಂದು ರೈತರು ತಿಳಿಸಿದ್ದಾರೆ.

ಕುಷ್ಟಗಿ ಪಟ್ಟಣದಲ್ಲಿ ದೊಡ್ಡಪ್ಪ ಗಡಾದ ಎಂಬ ರೈತರಿಗೆ ಸೇರಿದ ಎಮ್ಮೆ ಕರ ಸೇರಿದಂತೆ ತಾಲೂಕಿನ ಶಾಖಾಪುರ ಗ್ರಾಮದಲ್ಲಿ ರೈತ ನರಸಪ್ಪ ಜೂಲಕಟ್ಟಿ ಎಂಬುವವರ ಸುಮಾರು 60 ಸಾವಿರ ರೂ. ಮೌಲ್ಯದ ಎತ್ತು ಹಾಗೂ ತಾವರಗೇರಾದಲ್ಲಿ ಲಕ್ಷ್ಮಣ ಬಡಿಗೇರ ಎಂಬುವ ರೈತನಿಗೆ ಸೇರಿದ ಅಂದಾಜು 50 ಸಾವಿರ ರೂ. ಬೆಲೆ ಬಾಳುವ ಆಕಳು ವಿಚಿತ್ರ ಕಾಯಿಲೆ ಮೃತಪಟ್ಟಿದೆ.

ಕಳೆದೊಂದು ವಾರದಿಂದ ತೀವ್ರ ಜ್ವರ ಸೇರಿದಂತೆ ಚರ್ಮ ಕಾಯಿಲೆಯಿಂದ ಬಳಲುತ್ತಿದ್ದ ಈ ಜಾನುವಾರುಗಳ ಆರೈಕೆಗೆ ಸಾಕಷ್ಟು ಶ್ರಮಿಸಿದ್ದರು. ಆದರೆ, ಜಾನುವಾರುಗಳ ಬದುಕಿಸಿಕೊಳ್ಳಲು ಆಗಲಿಲ್ಲ. ಕೂಡಲೇ ಸಂಬಂಧಿಸಿದ ಪಶುಸಂಗೋಪನೆ ಇಲಾಖೆಯ ಅಧಿಕಾರಿಗಳು ತಮ್ಮ ಪರಿಸ್ಥಿತಿ ಅರಿತು ಪರಿಹಾರ ಘೋಷಣೆಗೆ ಕ್ರಮ ಕೈಗೊಳ್ಳಬೇಕು ಎಂದು ರೈತರು ಮನವಿ ಮಾಡಿದ್ದಾರೆ.