ಸುದ್ದಿಮೂಲ ವಾರ್ತೆ
ಶಿಡ್ಲಘಟ್ಟ, ಜು 19 : ಮಳಮಾಚನಹಳ್ಳಿ ಗ್ರಾಮದ ಗ್ರಾಮ ದೇವತೆಯಾದ ಗಂಗಮ್ಮ ತಾಯಿ ದೇವಾಲಯದಲ್ಲಿ ಕಳ್ಳತನ ನಡೆದಿದೆ.
ಹಲವಾರು ವರ್ಷಗಳಿಂದ ದೇಗುಲವಿಲ್ಲದೆ ಇದ್ದು ಭಕ್ತಾದಿಗಳ ಸಹಕಾರದಿಂದ ವರ್ಷದ ಹಿಂದೆ ಸುಂದರವಾದ ದೇವಾಲಯ ನಿರ್ಮಿಸಲಾಗಿತ್ತು. ದೇವರಿಗೆ ವಿಶೇಷ ಪೂಜೆಗಳು ನಡೆಯುತ್ತಿದ್ದು ದೇವಾಲಯದ ಅಭಿವೃದ್ಧಿಗೆ ದೇವಾಲಯದಲ್ಲಿ ಹುಂಡಿಯನ್ನು ಇಟ್ಟಿದ್ದರು.
ಭಕ್ತಾದಿಗಳು ಮಂಗಳಾರತಿ ತಟ್ಟೆಗೆ ಹಾಕಿದಂತಹ ಹಣವನ್ನು ಸಹ ಹುಂಡಿಯಲ್ಲೆ ಹಾಕುತ್ತಿರುವುದರಿಂದ ಹುಂಡಿಗೆ ಹಣ ಹೆಚ್ಚಿಗೆ ಸಂಗ್ರಹವಾಗುತ್ತಿತ್ತು. ಇದನ್ನೇ ತಮ್ಮ ಗುರಿಯಾಗಿಟ್ಟುಕೊಂಡ ಕಳ್ಳರು ಮಂಗಳವಾರ ರಾತ್ರಿ ದೇವಾಲಯದಎಲ್ಲಿ ತಮ್ಮ ಕೈ ಚಳಕ ತೋರಿಸಿದ್ದಾರೆ. ದೇವಾಲಯಕ್ಕೆ ಸಿ ಸಿ ಕ್ಯಾಮರಾಗಳನ್ನು ಅಳವಡಿಸಲಾಗಿದ್ದು,ಇದರಲ್ಲಿ ಎರಡು ಸಿಸಿ ಕ್ಯಾಮೆರಾ ಗಳನ್ನು ನಾಶ ಮಾಡಿ ದೇವಾಲಯದ ಬಾಗಿಲು ಒಡೆದು ಒಳಹೊಕ್ಕಿ ಉಂಡಿ ಹೊಡೆದು ಹಣದೋಚಿದ್ದಾರೆ.
ದೇವರಿಗೆ ಹಾಕಿದಂತಹ ಮಾಂಗಲ್ಯ ಸರ, ಬೆಳ್ಳಿ ಕಿರೀಟ, ಮುಖವಾಡ,ಹಾಗೂ ಬಂಗಾರದ ನೆಕ್ಲೆಸ್ ತೆಗೆದುಕೊಂಡಂತಹ ಕಳ್ಳರು ಪವಾಡ ಎಂಬಂತೆ ಅಲ್ಲೇ ಬಿಸಾಡಿ ಹೋಗಿದ್ದಾರೆ. ಬುಧವಾರ ಬೆಳಗ್ಗೆ ದೇವಾಲಯದ ಅರ್ಚಕರಾದ ಗ್ರಾಮದ ಮುನಿಕೃಷ್ಣರವರು ದೇವಾಲಯಕ್ಕೆ ಬಂದಾಗ ಈ ಪ್ರಕರಣ ಬೆಳಕಿಗೆ ಬಂದಿದೆ. ತಕ್ಷಣ ಗ್ರಾಮಸ್ಥರಿಗೆ ತಿಳಿಸಿ ನಂತರ ಪೊಲೀಸರಿಗೆ ತಿಳಿಸಿದ್ದಾರೆ.
ಸ್ಥಳಕ್ಕೆ ಆಗಮಿಸಿದ ಶಿಡ್ಲಘಟ್ಟ ಗ್ರಾಮಾಂತರ ಪೊಲೀಸ್ ಠಾಣೆ ಸಿಬ್ಬಂದಿ ಪರಿಶೀಲನೆ ಮಾಡಿ, ಶ್ವಾನದಳ ಆಗಮಿಸಿ ಪರಿಶೀಲನೆ ಮಾಡುವವರೆಗೂ ದೇವಾಲಯದ ಒಳಗಡೆ ಯಾರು ಹೋಗಬಾರದೆಂದು ಸದ್ಯಕ್ಕೆ ದೇವಾಲಯದ ಬಾಗಿಲು ಮುಚ್ಚಿದ್ದಾರೆ.