ಸುದ್ದಿಮೂಲವಾರ್ತೆ
ಕೊಪ್ಪಳ ಸೆ 09; ಸಮಾಜದಲ್ಲಿ ನೋವು, ಸಮಾಜಿಕ ಯಾತನೆಗಳು ಕಥೆಗಾರನ ಕಥೆಗಳಲ್ಲಿ ಅನಾವರಣಗೊಳ್ಳುತ್ತಿವೆ ಎಂದು ಕಥೆಗಾರ ಬಸು ಬೇವಿನಗಿಡದ ಹೇಳಿದರು.
ಅವರು ಕೊಪ್ಪಳ ತಾಲೂಕಾ ಪಂಚಾಯತ್ ಸಭಾಂಗಣದಲ್ಲಿ ಅಶೋಕ ಓಜನಳ್ಳಿಯವರ ದೇವರ ಡೇಟ್ ಆಪ್ ಬರ್ತ್ ಎಂಬ ಕಥಾ ಸಂಕಲನ ಬಿಡುಗಡೆ ಸಮಾರಂಭದಲ್ಲಿ ಕಥೆಗಳ ಕುರಿತು ಮಾತನಾಡಿದರು. ಬದುಕಿನ ಯಾತನೆಗಳು, ಕರಾಳ ಸತ್ಯಗಳು, ಸಾಮಾಜಿಕ ನಿರ್ದಯತೆ, ಕಾರುಣ್ಯ, ನಿರಾಶೆ ಹೀಗೆ ಎಲ್ಲವನ್ನೂ ಒಳಗೊಂಡ ಅಂಶಗಳಿವೆ. ಈ ಕಥೆಗಳಲ್ಲಿ ಬದುಕಿನ ಕಥನ ಅನಾವರಣಗೊಂಡಿದೆ ಎಂದರು.
‘ಓಜನಹಳ್ಳಿ ಅವರ ಕಥೆಗಳು ವಾಸ್ತವತೆ ತೆರೆದಿಡುತ್ತಿವೆ. ಒಪ್ಪಿಕೊಳ್ಳಲಾಗದ ಕರಾಳ ಸತ್ಯಗಳು ಇವೆ. ಇವುಗಳಿಂದ ಮನುಷ್ಯ ಮನಸ್ಸನ್ನು ಎಷ್ಟು ಕಠಿಣ ಮಾಡಿಕೊಳ್ಳಬಲ್ಲ ಎನ್ನುವುದು ಗೊತ್ತಾಗುತ್ತದೆ’ ಎಂದರು.
‘ಹೊಸ ತಲೆಮಾರಿನ ಕಥೆಗಾರರು ಭದ್ರರಾಗಿ ಬೆಳೆಯಲು ಸುಭದ್ರ ಬುನಾದಿ ಹಾಕಬೇಕು. ಕಥೆಗಾರ ಭವಿಷ್ಯದ ಸತ್ಯವನ್ನು ಹೇಳುವಂತಿರಬೇಕು. ಕಥೆಗಳು ಚಲಿಸುವ ಗುಣ ಹೊಂದಿರಬೇಕು. ಬದುಕಿನ ತವಕ, ತಲ್ಲಣ, ಕ್ಷೋಭೆಗಳನ್ನು ವ್ಯಕ್ತಪಡಿಸಬೇಕು. ದೇವರ ಬಗ್ಗೆ ಮನುಷ್ಯನ ನಡುವೆ ಇರುವ ಮನಸ್ಸುಗಳ ಒಡಕುತನವನ್ನು ಕಥಾ ಹಂದರ ಒತ್ತಿ ಹೇಳುತ್ತದೆ’ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.
ಪತ್ರಕರ್ತ ಶರಣಪ್ಪ ಬಾಚಲಾಪುರ ಮಾತನಾಡಿ ‘ಅಖಂಡ ರಾಯಚೂರು ಜಿಲ್ಲೆಯ ಕಥೆಗಾರರು ಕಥೆ ಕಟ್ಟುವ ಶೈಲಿ ತೀರಾ ವಿಭಿನ್ನ. ಇವು ಓದುಗರಿಗೂ ಆಪ್ತವೆನಿಸುತ್ತವೆ. ಓಜಿನಹಳ್ಳಿ ಅವರದ್ದು ಕಿರುಗತೆಗಳು ಇರುವುದರಿಂದ ಓದುಗರಿಗೆ ಬೇಗ ಆಕರ್ಷಣೆಯಾಗುತ್ತವೆ’ ಎಂದರು.
ಬಂಡಾಯ ಸಾಹಿತಿ ಅಲ್ಲಮಪ್ರಭು ಬೆಟ್ಟದೂರ ಮಾತನಾಡಿ ‘ಅಶೋಕ ಅವರ ಕಥೆಗಳು ವಿಶಿಷ್ಟ ಶೈಲಿ ಒಳಗೊಂಡಿದೆ. ಇಲ್ಲಿ ಕಥೆಯ ಗಾತ್ರಕ್ಕಿಂತ ಆಶಯವೇ ಮುಖ್ಯವಾಗುತ್ತದೆ. ಆದ್ದರಿಂದ ಇಂದಿನ ಲೇಖಕರು ವಡ್ಡಾರಾಧನೆಯಂಥ ಕಥೆಗಳನ್ನು ಓದಬೇಕು. ಕಥೆಗಳು ತುಳಿತಕ್ಕೊಳಾಗದವರ ಧ್ವನಿಯಾಗಿವೆ’ ಎಂದು ಹೇಳಿದರು.
ಈರಪ್ಪ ಬಿಜಲಿ, ಅನ್ನಪೂರ್ಣ ಪದ್ಮಸಾಲಿ, ಕಥೆಗಾರ ಅಶೋಕ ಓಜಿನಹಳ್ಳಿ, ಸಾಹಿತಿಗಳಾದ ಮಹೇಶ ಬಳ್ಳಾರಿ, ಮಹಾಂತೇಶ ಮಲ್ಲನಗೌಡರು ಸೇರಿದಂತೆ ಅನೇಕರು ಪಾಲ್ಗೊಂಡಿದ್ದರು.