ಸುದ್ದಿಮೂಲ ವಾರ್ತೆ
ದೇವನಹಳ್ಳಿ,ಜೂ.29 : ಅಕ್ಕಿ ಭಾಗ್ಯ ಯೋಜನೆಯಲ್ಲಿ ಐದು ಕೆಜಿ ಅಕ್ಕಿ ಬದಲು 170 ರೂಪಾಯಯನ್ನು ಫಲಾನುಭವಿಗಳ ಖಾತೆಗೆ ವರ್ಗಾಯಿಸಲು ನಿರ್ಧರಿಸಿರುವುದರಿಂದ ಅನ್ನಭಾಗ್ಯಕ್ಕೆ ಕನ್ನ ಹಾಕುವ ಬಿಜೆಪಿಯ ಸಂಚು ವಿಫಲಗೊಂಡಿದೆ ಎಂದು ಕೆಪಿಸಿಸಿ ವಕ್ತಾರ ಎ.ಎನ್ ನಟರಾಜ್ ಗೌಡ ಆರೋಪಿಸಿದರು.
ಪಟ್ಟಣದ ಕಾಂಗ್ರೆಸ್ ಕಛೇರಿಯಲ್ಲಿ ಹಮ್ಮಿಕೊಳ್ಳಲಾಗಿದ್ದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕಾಂಗ್ರೆಸ್ ಸರ್ಕಾರವೇ ತಂದಂತಹ ಆಹಾರ ಭದ್ರತಾ ಯೋಜನೆಯಡಿ ಇಂದು ರಾಜ್ಯದ ಬಿಪಿಎಲ್ ಬಳಕೆದಾರರ ಪ್ರತಿಯೊಬ್ಬರಿಗೂ ಐದು ಕೆಜಿ ಅಕ್ಕಿ ಸಿಗುತ್ತಿದೆ. ನಮ್ಮ ಯೋಜನೆಯಂತೆ 10 ಕೆಜಿ ಅಕ್ಕಿ ನೀಡಲು ಕೇಂದ್ರ ಸರ್ಕಾರ ಸಹಕರಿಸುತ್ತಿಲ್ಲ. ಸಾಕಷ್ಟು ಅಕ್ಕಿ ಹಾಗೂ ಧವಸ ಧಾನ್ಯಗಳು ಗೋದಾಮುಗಳಲ್ಲಿದ್ದರೂ ರಾಜ್ಯದ ಬೇಡಿಕೆಯನ್ನು ಕೇಂದ್ರ ತಿರಸ್ಕರಿಸಿತು. ಇದು ದ್ವೇಷ ರಾಜಕಾರಣ. ಇದನ್ನು ಸಮರ್ಥಿಸಿಕೊಳ್ಳುತ್ತಿರು ಬಿಜೆಪಿ ಮುಖಂಡರು ರಾಜ್ಯದ ಹಿತವನ್ನು ಬಲಿಕೊಟ್ಟಿದ್ದಾರೆ ಎಂದು ಆರೋಪಿಸಿದರು.
ಕೆಪಿಸಿಸಿ ಜಿಲ್ಲಾ ಉಪಾಧ್ಯಕ್ಷರಾದ ವಿ.ಶಾಂತಕುಮಾರ್ ಮಾತನಾಡಿ, ಬರೀ ಬೊಗಳೆ ಭಾಷಣ ಬಿಗಿಯುವ, ಗಾಳಿಯಲ್ಲಿ ಗೋಪುರ ಕಟ್ಟುವ, ಸ್ವಯಂ ಪ್ರಶಂಸೆ ಮಾಡಿಕೊಳ್ಳುವ, ಜನರ ಮೂಲಭೂತ ಸಮಸ್ಯೆಗಳನ್ನು ಅರ್ಥಮಾಡಿಕೊಳ್ಳದ ನಾಯಕರಿಂದ ದೇಶ ನಿರ್ಮಾಣ ಅಸಾಧ್ಯ. ಬಡವರ ಮಧ್ಯಮ ವರ್ಗದವರ ಎಲ್ಲ ಜಾತಿ ಜನಾಂಗಗಳ ಒಳಿತನ್ನು ಬಯಸುವ ನುಡಿದಂತೆ ನಡೆಯುವ ನಾಯಕರನ್ನು ಕಾಂಗ್ರೆಸ್ ಇಂದು ರಾಜ್ಯಕ್ಕೆ ಕೊಟ್ಟಿದೆ. ಸಮಾಜದಲ್ಲಿ ಅಶಾಂತಿಯನ್ನು ಉಂಟುಮಾಡುವ ಬಿಜೆಪಿಯ ಅಜೆಂಡಾಗಳು ಬಡವರ ಕಣ್ಣೀರನ್ನು ಮರೆಸುವ ಯೋಜನೆಗಳಾಗಿದ್ದವು. ಆದರೆ ಈ ಗ್ಯಾರಂಟಿ ಯೋಜನೆಗಳು ಅನ್ನಭಾಗ್ಯ, ಗೃಹಲಕ್ಷ್ಮಿ, ಗೃಹಜ್ಯೋತಿ, ಶಕ್ತಿ, ಯೋಜನೆಗಳು ಬಡವರ ಕಣ್ಣೀರನ್ನು ಒರೆಸುವ ಯೋಜನೆಗಳಾಗಿವೆ ಎಂದು ತಿಳಿಸಿದರು.
ಇದೇ ಸಂದರ್ಭದಲ್ಲಿ ದೇವನಹಳ್ಳಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಪ್ರಸನ್ನಕುಮಾರ್ ಹಾಗೂ ವಿಜಯಪುರ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ರಾಮಚಂದ್ರಪ್ಪ, ಜಿಲ್ಲಾ ಸಾಮಾಜಿಕ ಜಾಲತಾಣ ಅಧ್ಯಕ್ಷ ಸಂದೀಪ್, ಮಂಜುನಾಥ್ ಆದ್ಯ ಹಾಗೂ ಕಾಂಗ್ರೆಸ್ ಮುಖಂಡರು ಭಾಗಿಯಾಗಿದ್ದರು