ಮಹಿಳೆಯರ ನೃತ್ಯಕ್ಕೆ ಹೆಜ್ಜೆ ಹಾಕಿದ ಶಾಸಕ ವೆಂಕಟಪ್ಪ ನಾಯಕ

ಮಾನ್ವಿ ತಾಲೂಕಾ ಪ್ರಥಮ ಮಹಿಳಾ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷೆ ಮಧುಕುಮಾರಿ ಪಾಂಡೆ ಇವರನ್ನು ಸಾರೋಟದಲ್ಲಿ ಅದ್ದೂರಿಯಾಗಿ ಮೆರವಣಿಗೆ ಮಾಡಲಾಯಿತು.

ಪುರಸಭಾಧ್ಯಕ್ಷೆ ರಶೀದಾಬೇಗಂ ಬಸವ ವೃತ್ತದಲ್ಲಿ ಮೆರವಣಿಗೆಗೆ ಚಾಲನೆ ನೀಡಿದರು.

ಶಾಸಕ ರಾಜಾ ವೆಂಕಟಪ್ಪ ನಾಯಕ ಮತ್ತು ಕಸಾಪ ಅಧ್ಯಕ್ಷ ರವಿಕುಮಾರ ಪಾಟೀಲ್ ಸಮ್ಮೇಳನ ಅಧ್ಯಕ್ಷರಿಗೆ ಹೂಮಾಲೆ ಹಾಕಿ ಅಭಿನಂದಿಸಿದರು. ಮೆರವಣಿಗೆಯಲ್ಲಿ ಭಾಗವಹಿಸಿದ್ದ ಶಾಸಕ ಹಾಗೂ ಸಮ್ಮೇಳನದ ಸ್ವಾಗತ ಸಮಿತಿಯ ಅಧ್ಯಕ್ಷ ರಾಜಾ ವೆಂಕಟಪ್ಪ ನಾಯಕ ಮಹಿಳಾ ತಂಡದ ಡೊಳ್ಳು ನಾದ ಮತ್ತು ಮಹಿಳೆಯರ ನೃತ್ಯಕ್ಕೆ ಹೆಜ್ಜೆ ಹಾಕಿ ಸ್ವಲ್ಪ ಹೊತ್ತು ಕುಣಿದು ನೋಡುಗರ ಗಮನ ಸೆಳೆದರು.

ಶಾಸಕ ರಾಜಾ ವೆಂಕಟಪ್ಪ ನಾಯಕ, ಕಸಾಪ ಅಧ್ಯಕ್ಷ ರವಿಕುಮಾರ ಪಾಟೀಲ್, ಜಿಲ್ಲಾಧ್ಯಕ್ಷ ರಂಗಣ್ಣ ಪಾಟೀಲ್ ಅಳ್ಳುಂಡಿ,  ತಹಸೀಲ್ದಾರ್ ಚಂದ್ರಕಾಂತ, ರಾಜಾ ರಾಮಚಂದ್ರ ನಾಯಕ, ರಾಜಾ ಮಹೇಂದ್ರ ನಾಯಕ ಸೇರಿದಂತೆ ಅನೇ ಗಣ್ಯರು, ಮಹಿಳೆಯರು ಡೊಳ್ಳು ಹೆಗಲೇರಿಸಿಕೊಂಡು ಬಾರಿಸುವುದರ ಮೂಲಕ ನೃತ್ಯ ಮಾಡಿದರು. ಯುವತಿಯರ ಕುಂಭ, ಕಳಸ, ಕೋಲಾಟ ನೃತ್ಯ ಗಮನ ಸೆಳೆಯಿತು‌. ಮಹಿಳೆಯರು ಉತ್ಸಾಹದಿಂದ ಗುಂಪು‌ ನೃತ್ಯ ಮಾಡಿ ಸಮ್ಮೇಳನಾಧ್ಯಕ್ಷರಿಗೆ ಜೈಕಾರ ಕೂಗಿದರು. ಒಟ್ಟಾರೆಯಾಗಿ ಮಹಿಳಾ ಸಾಹಿತ್ಯ ಸಮ್ಮೇಳನದಲ್ಲಿ ಪುರುಷರು ಸಾಥ್ ನೀಡಿ ಮಹಿಳೆಯರಿಗೆ ಸ್ಪೂರ್ತಿ ತುಂಬಿದರು.

ಮಾಜಿ ಶಾಸಕರಾದ ಬಸನಗೌಡ ಬ್ಯಾಗವಾಟ, ಗಂಗಾಧರ ನಾಯಕ ಸೇರಿದಂತೆ ಅನೇಕ ಗಣ್ಯರು, ನೂರಾರು ಕನ್ನಡ ಅಭಿಮಾನಿಗಳು, ಮಹಿಳೆಯರು, ಕಸಾಪ ಪದಾಧಿಕಾರಿಗಳು  ಮೆರವಣಿಗೆಯಲ್ಲಿ ಭಾಗವಹಿಸಿದ್ದರು.