ಸಂಸದರ ಆಯ್ಕೆ ತಪ್ಪಿಗೆ ಬಾರುಕೋಲಿನಿಂದ ಹೊಡೆದುಕೊಂಡು ಪ್ರತಿಭಟನೆ

ಸುದ್ದಿಮೂಲ ವಾರ್ತೆ

ಮೈಸೂರು, ನ.05 : ಕಾವೇರಿ ನದಿ ನೀರಿನ ಹಂಚಿಕೆ ವಿಚಾರದಲ್ಲಿ ಮೌನವಾಗಿರುವ ರಾಜ್ಯದ ಸಂಸದರನ್ನು ಆಯ್ಕೆ ಮಾಡಿದ ತಪ್ಪಿಗೆ ಬಾರುಕೋಲಿನಿಂದ ತಾವೇ ಹೊಡೆದುಕೊಂಡು ಕನ್ನಡ ಚಳವಳಿಗಾರರು ವಿನೂತನ ಪ್ರತಿಭಟನೆ ನಡೆಸಿದರು.

ಚಾಮರಾಜನಗರದಲ್ಲಿ ಭಾನುವಾರ ಕನ್ನಡ ಪರ ಸಂಘಟನೆಗಳ ಕಾರ್ಯಕರ್ತರು ಶ್ರೀ ಭುವನೇಶ್ವರಿ ವೃತ್ತದಲ್ಲಿ ಸಮಾಯಿಸಿ ರಸ್ತೆತಡೆ ನಡೆಸಿದ್ದಲ್ಲದೆ ಕೈಯಲ್ಲಿ ಬಾರುಕೋಲ್ ಹಿಡಿದುಕೊಂಡು ಕೇಂದ್ರ, ತಮಿಳುನಾಡು ಹಾಗೂ ಮೌನವಾಗಿರುವ ರಾಜ್ಯದ ಸಂಸದರ ವಿರುದ್ದ ಕಿಡಿಕಾರಿ ತಮಗೆ ತಾವೇ ಬಾರ್ ಕೋಲಿನಿಂದ ಹೊಡೆದುಕೊಳ್ಳುವ ಮೂಲಕ ಪ್ರತಿಭಟನೆಯ 54ನೇ ದಿನ ಆಚರಿಸಿದರು.

ರಾಜ್ಯದ ಜನತೆಯ ಮತಗಳಿಂದ ಆಯ್ಕೆಯಾದ ಸಂಸದರಿಗೆ ಕಾವೇರಿ ನೀರಿನ‌ ಸಮಸ್ಯೆ ಬಗೆಹರಿಸಲು ಸಾಧ್ಯವಾಗುತ್ತಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಕರ್ನಾಟಕ ಸೇನಾ ಪಡೆಯ ರಾಜ್ಯಾಧ್ಯಕ್ಷ ಚಾ.ರಂ‌ ಶ್ರೀನಿವಾಸಗೌಡ, ಚಳವಳಿಗಾರರಾದ ಶಾ.ಮುರಳಿ, ರಾಜ್ ಗೋಪಾಲ್, ನಿಜದ್ವನಿ ಗೋವಿಂದರಾಜು, ಮಹೇಶ್ ಗೌಡ ಹಾಗೂ ಇನ್ನಿತರರು ಭಾಗಿಯಾಗಿದ್ದರು.