ಬಳ್ಳಾರಿ, ಜೂ. 29:ಆಷಾಡ ಶುದ್ದ ಮೊದಲ ಏಕಾದಶಿಯ ಹಿನ್ನೆಲೆಯಲ್ಲಿ ಸತ್ಯನಾರಾಯಣ ಪೇಟೆ ಬಡಾವಣೆಯ ಶ್ರೀಮಧ್ವ ಸಂಘದಲ್ಲಿ ಉಡುಪಿಯ ಅದಮಾರು ಮಠದ ಶ್ರೀ ವಿಶ್ವಪ್ರಿಯ ತೀರ್ಥ ಸ್ವಾಮೀಜಿ ಅವರು ಸಂಸ್ಥಾನ ಪೂಜೆ, ಭಕ್ತರಿಗೆ ತಪ್ತ ಮುದ್ರಾಧಾರಣೆ, ಸುದರ್ಶನ ಹೋಮ ಹಾಗೂ ವಿಶೇಷ ಪೂಜೆಯನ್ನು ನೆರವೇರಿಸಿದ್ದಾರೆ.
ಭಕ್ತಾಧಿಗಳು ಹೋಮ, ಹವನ ಪ್ರಕ್ರಿಯೆಲ್ಲಿ ಸಕ್ರಿಯವಾಗಿ ಪಾಲ್ಗೊಂಡು ತಪ್ತ ಮುದ್ರಧಾರಣೆಯನ್ನು ಸ್ವೀಕರಿಸಿದರು. ಕಪ್ಪಗಲ್ಲು ರಸ್ತೆ ಶ್ರೀಕೃಷ್ಣ ಮಂದಿರ, ಸಿರಗುಪ್ಪ ರಸ್ತೆಯ ಶ್ರೀಯಂತ್ರೋದ್ಧಾರಕ ಪ್ರಾಣದೇವರ ದೇವಾಲಯಕ್ಕೆ ಸ್ವಾಮಿಗಳು ಭೇಟಿ ಮಾಡಿ, ವಿಶೇಷ ಪೂಜೆ ನೆರವೇರಿಸಿ ಅಲ್ಲಿಯೂ
ಭಕ್ತಾಧಿಗಳಿಗೆ ತಪ್ತ ಮುದ್ರಧಾರಣೆ ನೆರವೇರಿಸಿ ಸಾಮೂಹಿಕ ಸುದರ್ಶನ ಹೋಮ ನಡೆಸಿದರು.
ಪಂಡಿತರಾದ ವೇಣು ಮಾಧವಾಚಾರ್, ಪವಮಾನಾ ಆಚಾರ್, ಗೋಪಾಲಕೃಷ್ಣ ಸಾಮಗ, ಯಂತ್ರೋದ್ಧಾರಕ ಪ್ರಾಣದೇವರ ದೇಗುಲ ಪ್ರಧಾನ ಅರ್ಚಕ ಬಲರಾಮ್ ಆಚಾರ್ ಸೇರಿ ಅನೇಕರು ಪೂಜಾ ವಿಧಿಗಳನ್ನು ನೆರವೇರಿಸಿದರು.