ಕೆಜಿಎಫ್ ವಿಧಾನಸಭಾ ಕ್ಷೇತ್ರದಲ್ಲಿ ಮಹಿಳೆಯರೇ ಹೆಚ್ಚು

ಸುದ್ದಿಮೂಲ ವಾರ್ತೆ
ಕೆಜಿಎಫ್, ಮಾ.29: ಕೆಜಿಎಫ್ ವಿಧಾನಸಭೆ ಕ್ಷೇತ್ರದಲ್ಲಿ ಒಟ್ಟು 1,91,750 ಮತದಾರರು ಇದ್ದು, ಮಹಿಳೆಯರು ಪುರುಷರಿಗಿಂತ ಅಧಿಕ ಸಂಖ್ಯೆಯಲ್ಲಿದ್ದಾರೆ. ಮಹಿಳೆಯರ ಸಂಖ್ಯೆ 96,246 ಇದೆ ಎಂದು ಚುನಾವಣಾಧಿಕಾರಿ ಮೊಹಮದ್ ಅತೀಕ್ ಷರೀಫ್ ಹೇಳಿದರು.

ಇಂದು ನಗರದಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿ, ಕೆಜಿಎಫ್ ಕ್ಷೇತ್ರದಲ್ಲಿ ಒಟ್ಟು 232 ಮತಗಟ್ಟೆಗಳು ಇವೆ. ಅವುಗಳ ಪೈಕಿ 115 ನಗರ ಮತ್ತು 117 ಗ್ರಾಮೀಣ ಭಾಗದಲ್ಲಿದೆ. ಅವುಗಳ ಪೈಕಿ 50 ಸೂಕ್ಷ್ಮ ಮತಗಟ್ಟೆಗಳಾಗಿದೆ ಎಂದು ಹೇಳಿದರು.

ಅಂಗವಿಕಲ ಮತ್ತು80 ವರ್ಷ ದಾಟಿದ ಮತದಾರರ ಸಂಖ್ಯೆ 2215 ಮತ್ತು 4369 ಆಗಿದೆ. ತಾಲ್ಲೂಕಿನ ನಲ್ಲಗಟ್ಟೂರು, ಕೆಂಪಾಪುರ, ವೆಂಕಟಾಪುರ ಮತ್ತು ಜೆಕೆ ಪುರಗಳಲ್ಲಿ ಚೆಕ್ ಪೋಸ್ಟ್ ತೆರೆಯಲಾಗಿದೆ. ಮೂರು ಫ್ಲೈಯಿಂದ ಸ್ಕ್ವಾಡ್ ಇದೆ ಎಂದು ಸಹಾಯಕ ಚುನಾವಣಾಧಿಕಾರಿ ತಹಶೀಲ್ದಾರ್ ಎಚ್.ಶ್ರೀನಿವಾಸ್ ಹೇಳಿದರು.

ಸಾರ್ವಜನಿಕರು ದೂರುಗಳು ಮತ್ತು ಮಾಹಿತಿಯನ್ನು ನೇರವಾಗಿ ಚುನಾವಣಾಧಿಕಾರಿಗಳ ಮೊಬೈಲ್ ಸಂಖ್ಯೆ 9845625583 ಮತ್ತು ಸಹಾಯಕ ಚುನಾವಣಾಧಿಕಾರಿ ಅವರ 8105841396 ಕ್ಕೆ ಕರೆ ಮಾಡಬಹುದು ಎಂದು ಅವರು ತಿಳಿಸಿದರು.

ನಗರಸಭೆ ಆಯುಕ್ತೆ ಅಂಬಿಕಾ ಮತ್ತು ಡಿವೈಎಸ್ಪಿ ರಮೇಶ್ ಇದ್ದರು.