ಬಳ್ಳಾರಿ, ಜೂನ್, 30;ಗುರುವಾರ ಸಂಜೆಯ ಬಕ್ರೀದ್ ಹಬ್ಬದ ಸಂಭ್ರಮಾಚರಣೆಯ ಪಾರ್ಟಿ ಮಾಡುವಾಗ ಸ್ನೇಹಿತರು ಪರಸ್ಪರಲ್ಲಿ ನಡೆದ ಜಗಳ ಓರ್ವನ ಕೊಲೆಯಲ್ಲಿ ಮುಕ್ತಾಯಗೊಂಡಿದೆ.
ಕೊಲೆಯಾದ ಯುವಕ ಕಲಬುರಗಿಯಲ್ಲಿ ಅರೇಬಿಕ್ ವಿದ್ಯಾಭ್ಯಾಸ ಮಾಡುತ್ತಿದ್ದ, ಬಳ್ಳಾರಿಯ ನೇತಾಜಿ ನಗರದ ನಿವಾಸಿ ಲಿಯಾಖತ್ ರೋಷನ್ (24).
ಕಲಬುರ್ಗಿಯಿಂದ ಬಕ್ರೀದ್ ಆಚರಣೆಗಾಗಿ ಸ್ವಂತ ಊರಾದ ಬಳ್ಳಾರಿಗೆ ಬುಧವಾರ ಬಂದಿದ್ದ ಲಿಯಾಖತ್ ರೋಷನ್, ಗುರುವಾರದ ಸಾಮೂಹಿಕ ಪ್ರಾರ್ಥನೆಯಲ್ಲಿ ಸಕ್ರಿಯವಾಗಿ ಪಾಲ್ಗೊಂಡು, ಸಂಜೆವೇಳೆ ಸೂರಿ ಕಾಲೊನಿಯಲ್ಲಿ ನಡೆದ ಸ್ನೇಹಿತರಗೊಂದಿಗಿನ ಪಾರ್ಟಿಯಲ್ಲಿದ್ದ.
ಪಾರ್ಟಿಯ ವೇಳೆ ಸ್ನೇಹಿತರಲ್ಲಿ ಮಾತಿಗೆ ಮಾತು ಬೆಳೆದು, ಜಗಳವಾಗಿ ಮಾರಾಕಾಸ್ತ್ರಗಳಿಂದ ಪರಸ್ಪರ ಹೊಡೆದಾಡಿಕೊಂಡಿದ್ದಾರೆ. ಆಗ, ಸ್ನೇಹಿತರ ಗುಂಪು ಲಿಯಾಖತ್ ರೋಷನನ್ನು ಚಾಕುವಿನಿಂದ ಚುಚ್ಚಿ ಕೊಲೆ ಮಾಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಪೊಲೀಸರು ಶಂಕಿತರನ್ನು ವಶಕ್ಕೆ ತೆಗೆದುಕೊಂಡು ವಿಚಾರಣೆ ನಡೆಸುತ್ತಿದ್ದಾರೆ. ಕೊಲೆಗೆ ನಿಖರವಾದ ಕಾರಣ ತಿಳಿದುಬಂದಿಲ್ಲ. ಬಳ್ಳಾರಿ ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ನಡೆದಿದೆ.
