ಸುದ್ದಿಮೂಲವಾರ್ತೆ
ಕನಕಗಿರಿ,ಏ.೮- ಗಂಗಾವತಿ ವಿಧಾನಸಭಾ ಕ್ಷೇತ್ರದ ಕಾಂಗ್ರೆಸ್ ಪಕ್ಷದ ಟಿಕೆಟ್ ವಂಚಿತ ವಿಧಾನ ಪರಿಷತ್ ಮಾಜಿ ಸದಸ್ಯ ಹೆಚ್.ಆರ್.ಶ್ರೀನಾಥ್ ಅವರ ನಿವಾಸಕ್ಕೆ ಕನಕಗಿರಿ ಬಿಜೆಪಿ ಶಾಸಕ ಬಸವರಾಜ ದಢೇಸೂಗೂರು ಭಾನುವಾರ ಗುಪ್ತವಾಗಿ ಭೇಟಿ ನೀಡಿ ಶ್ರೀನಾಥರನ್ನು ಬಿಜೆಪಿ ಸೇರ್ಪಡೆಗೆ ಆಹ್ವಾನಿಸಿದ್ದಾರೆಂದು ತಿಳಿದಿದೆ.
ಪ್ರಸಕ್ತ ಚುನಾವಣೆ ಕುರಿತು ಬಸವರಾಜ ಮತ್ತು ಶ್ರೀನಾಥರು ರಹಸ್ಯವಾಗಿ ಸುರ್ಧೀರ್ಘವಾಗಿ ಮಾತುಕತೆ ನಡೆಸಿ ಬಿಜೆಪಿ ಪಕ್ಷಕ್ಕೆ ತಾವು ಸೇರುವುದಾದರೆ ಕೂಡೇ ನಮ್ಮ ಪಕ್ಷದ ಜಿಲ್ಲಾ ಮತ್ತು ರಾಜ್ಯ ಮಟ್ಟದ ನಾಯಕರ ಗಮನಕ್ಕೆ ತರುವೆ. ಬಿಜೆಪಿ ಸೇರದಿದ್ದರೂ ಪ್ರಸಕ್ತ ಚುನಾವಣೆಯಲ್ಲಿ ತಮಗೆ ತಾವು ಮತ್ತು ತಮ್ಮ ಬೆಂಬಲಿಗರನ್ನು ಬೆಂಬಲಿಸುವಂತೆ ಬಸವರಾಜ ದಢೇಸೂಗೂರು ಮನವಿ ಮಾಡಿದ್ದಾರೆಂದು ಅಲ್ಲಿದ್ದ ಪ್ರತ್ಯಕ್ಷದರ್ಶಿಗಳಿಂದ ತಿಳಿದಿದೆ.
ಗಂಗಾವತಿ ಕಾಂಗ್ರೆಸ್ ಟಿಕೆಟ್ನಿಂದ ವಂಚಿರಾಗಿದ್ದರಿಂದ ಹೆಚ್. ಆರ್. ಶ್ರೀನಾಥ್ ಈಗಾಗಲೇ ತಮ್ಮ ಪಕ್ಷದ ರಾಜ್ಯ ಮತ್ತು ಕೇಂದ್ರ ವರಿಷ್ಠರ ಹಾಗೂ ಜಿಲ್ಲಾ ಮಟ್ಟದ ನಾಯಕರ ವಿರುದ್ಧ ತಮ್ಮ ಅಸಮಧಾನ ಹೊರ ಹಾಕುವುದರೊಂದಿಗೆ ಮುಂದಿನ ನಿಲುವಿನ ಬಗ್ಗೆ ಇದೆ ತಿಂಗಳ ೧೯ರ ನಂತರ ಪ್ರಕಟಿಸುವುದಾಗಿ ಹೇಳಿಕೆ ನೀಡಿದ್ದಾರೆ. ಈ ಹೇಳಿಕೆ ನೀಡಿದ ಮರು ದಿನವೇ ಬಿಜೆಪಿ ಶಾಸಕ ಬಸವರಾಜ ದಢೇಸೂಗೂರು ಶ್ರೀನಾಥರ ನಿವಾಸಕ್ಕೆ ಭೇಟಿ ನೀಡಿದ್ದು, ಗಂಗಾವತಿ-ಕನಕಗಿರಿ ವಿಧಾನ ಸಭಾ ಕ್ಷೇತ್ರಗಳ ರಾಜಕೀಯ ಕ್ಷೇತ್ರದ ವಲಯದಲ್ಲಿ ಅಚ್ಚರಿ ಮೂಡಿಸಿದೆ.
ಈ ಈರ್ವ ನಾಯಕರ ರಹಸ್ಯ ಭೇಟಿ ಸಹಜವಾಗಿ ರಾಜಕೀಯ ವಲಯದಲ್ಲಿ ಮಾತ್ರ ಸಂಚಲನ ಸೃಷ್ಠಿಸಿದ್ದಲ್ಲದೇ ಶಾಸಕ ಬಸವರಾಜ ದಢೇಸೂಗೂರು ಮತ್ತು ಹೆಚ್. ಆರ್. ಶ್ರೀನಾಥ್ರ ರಾಜಕೀಯ ವಿರೋಧಿಗಳನ್ನೂ ನಿದ್ರೆಗೆಡಿಸಿದೆ.
