ನಾಳೆಯಿಂದ ಅರಮನೆ ಮೈದಾನದಲ್ಲಿ ಕಂಬಳ

ಸುದ್ದಿಮೂಲ ವಾರ್ತೆ

ಬೆಂಗಳೂರು, ನ. 24 : ಇತಿಹಾಸದಲ್ಲೇ ಮೊಟ್ಟ ಮೊದಲ ಬಾರಿಗೆ ಸಿಲಿಕಾನ್ ಸಿಟಿ ಬೆಂಗಳೂರಿನ ಅರಮನೆ ಆವರಣದಲ್ಲಿ ಇಂದಿನಿಂದ ಕಂಬಳ ನಡೆಯಲಿದ್ದು, ಅರಮನೆ ಮೈದಾನದಲ್ಲಿ ಸಕಲ ಸಿದ್ಧತೆಗಳು ನಡೆಯುತ್ತಿವೆ.

ಕಂಬಳದಲ್ಲಿ ವಿಜೇತರಾಗುವ ಕೋಣದ ಮಾಲೀಕರಿಗೆ 1 ಲಕ್ಷ ರೂ. ನಗದು, 16 ಗ್ರಾಂ ಸ್ವರ್ಣ ಕೊಡಲಾಗುತ್ತದೆ. ದ್ವಿತೀಯ ಸ್ಥಾನ ಗಳಿಸಿದವರಿಗೆ 50 ಸಾವಿರ ರೂ. ಜತೆಗೆ 2.8 ಗ್ರಾಂ ಚಿನ್ನ ಮತ್ತು ತೃತೀಯ ಸ್ಥಾನ ಪಡೆದವರಿಗೆ 25 ಸಾವಿರ ರೂ. ನಗದು ಹಾಗೂ 4 ಗ್ರಾಂ ಬಂಗಾರದ ಪದಕವನ್ನು ಬಹುಮಾನವಾಗಿ ನೀಡಲಾಗುತ್ತದೆ.

ಬೆಂಗಳೂರಿನಲ್ಲಿ ನಡೆಯುವ ಕಂಬಳಕ್ಕೆ 77.50- 78 ಕೋಟಿ ರೂ. ವೆಚ್ಚ ತಗಲುವ ನಿರೀಕ್ಷೆಯಿದ್ದು, ಸರ್ಕಾರ ಒಂದು ಕೋಟಿ ರೂ. ಅನುದಾನ ಪ್ರಕಟಿಸಿದೆ. ಬೆಂಗಳೂರಿನ ಪ್ರತಿಷ್ಠಿತ ಸಂಸ್ಥೆಗಳು ಹಣ ಸಹಾಯ ಮಾಡುವ ಮೂಲಕ ಕಾರ್ಯಕ್ರಮಕ್ಕೆ ಕೈಜೋಡಿಸಿವೆ.

ಕರಾವಳಿಯಿಂದ ಬಂದ ಕುಡಿಯುವ ನೀರು

ಈಗಾಗಲೇ ಕಂಬಳದಲ್ಲಿ ಭಾಗವಹಿಸಲು ಸುಮಾರು 200 ಜೊತೆ ಕೋಣಗಳು ಕರಾವಳಿಯಿಂದ ಬಂದಿಳಿದಿವೆ. ಈ ಕೋಣಗಳ ಜೊತೆಯಲ್ಲಿ ಅವುಗಳು ಸೇವಿಸುವ ನೀರು ಕೂಡ ಮಂಗಳೂರಿನಿಂದಲೇ ಬಂದಿವೆ. ಈ ಕೋಣಗಳು ಕುಡಿಯುವ ನೀರನ್ನು ಮಂಗಳೂರಿನಿಂದ ಟ್ಯಾಂಕರ್‌ ಗಳು ಮೂಲಕ ಬೆಂಗಳೂರಿಗೆ ತರಲಾಗಿದೆ. ಕುಡಿಯಲು ಈ ನೀರನ್ನು ಮಾತ್ರವೇ ಬಳಸಲಾಗುತ್ತಿದೆ. ಕಾರಣ ಕೋಣಗಳ ಆರೋಗ್ಯದ ಬಗ್ಗೆ ಇರುವ ಹೆಚ್ಚಿನ ಕಾಳಜಿ. ಕೋಣಗಳಿಗೆ ನೀರು ಮಾತ್ರವಲ್ಲ ಕೋಣಗಳಿಗೆ ಕೊಡಬೇಕಾದ ಆಹಾರ, ಬೈ ಹುಲ್ಲನ್ನು ಅಲ್ಲಿಂದಲೇ ಲಾರಿಯಲ್ಲಿ ತರಲಾಗಿದೆ. ಈ ಕಂಬಳದಲ್ಲಿ ಪಶುವೈದ್ಯರು ಮತ್ತು ನಾಟಿ ವೈದ್ಯರು ಮೊಕ್ಕಾಂ ಹೂಡಲಿದ್ದಾರೆ.

ಸಾಮಾನ್ಯವಾಗಿ ನವೆಂಬರ್‌ ನಿಂದ ಏಪ್ರಿಲ್‌ ವರೆಗೂ ಕಂಬಳ ನಡೆಯಲಿವೆ. ಹೀಗಾಗಿ, ಕೋಣಗಳ ಆರೋಗ್ಯ ಬಹಳ ಮುಖ್ಯವಾಗಿರುತ್ತದೆ. ಈ ಕೋಣಗಳು ಪ್ರತಿ ವಾರ ಒಂದೊಂದು ಕಂಬಳದಲ್ಲಿ ಎರಡು ದಿನಗಳ ಕಾಲ ಭಾಗವಹಿಸಬೇಕಾಗಿರುತ್ತದೆ. ಪ್ರತಿ ಶನಿವಾರ ಮತ್ತು ಭಾನುವಾರ ನಿರಂತರವಾಗಿ ಕಂಬಳ ಇದ್ದೇ ಇರುತ್ತದೆ. ಹೀಗಾಗಿ ಅವುಗಳ ಆರೋಗ್ಯ ತುಂಬಾ ಮುಖ್ಯವಾಗಿರುತ್ತದೆ.