ಸುದ್ದಿಮೂಲ ವಾರ್ತೆ
ಶಿಡ್ಲಘಟ್ಟ, ಜು 14 : ಶ್ರೀ ಕ್ಷೇತ್ರ ಗ್ರಾಮಾಭಿವೃದ್ಧಿ ಯೋಜನೆ ಬಿ.ಸಿ ಟ್ರಸ್ಟ್ ವತಿಯಿಂದ ಅಸೌಖ್ಯದಿಂದ ಆಸ್ಪತ್ರೆ ಸೇರಿ ಚಿಕಿತ್ಸೆ ಪಡೆದ 18 ಮಂದಿ ಸದಸ್ಯರಿಗೆ ಆರೋಗ್ಯ ರಕ್ಷಾ ಹಾಗೂ ಸಂಪೂರ್ಣ ರಕ್ಷಾ ಮೊತ್ತವನ್ನು ವಿತರಿಸಲಾಯಿತು.
ಶ್ರೀ ಕ್ಷೇತ್ರ ಗ್ರಾಮ ಅಭಿವೃದ್ಧಿ ಯೋಜನೆ ಜಿಲ್ಲಾ ನಿರ್ದೇಶಕ ಪ್ರಶಾಂತ್ ಸಿ.ಎಸ್ ಮಾತನಾಡಿ, ತಾಲ್ಲೂಕಿನಲ್ಲಿ 127 ಸದಸ್ಯರಿಗೆ ಒಟ್ಟು 11,11,396 ರೂಪಾಯಿ ಮೊತ್ತ ವಿತರಣೆ ಮಾಡಿದ್ದು, ಸ್ವಸಾಯ ಸಂಘದ ಸದಸ್ಯರ ಮತ್ತು ವಿನಿಯೋಗದಾರರ ಆರೋಗ್ಯ ದೃಷ್ಟಿಯಿಂದ ಆರೋಗ್ಯ ರಕ್ಷಾ ಕಾರ್ಡ್ ವಾರ್ಷಿಕ ರೂ100 ಸದಸ್ಯತ್ವವನ್ನು ಹೊಂದಿ ನೋಂದಾವಣೆ ಮಾಡಿಕೊಂಡು ಸದಸ್ಯರಿಗೆ ಈ ಸವಲತ್ತುಗಳನ್ನು ಪಡೆದುಕೊಳ್ಳಲು ಅವಕಾಶ ಮಾಡಿಕೊಡಲಾಗಿದೆ.
ಸಂಘದ ಸದಸ್ಯರಿಗೆ ಸ್ವ-ಉದ್ಯೋಗ, ಆರ್ಥಿಕ ವ್ಯವಹಾರದ ಬಗ್ಗೆ ಶಿಸ್ತು ಮೂಡಿಸುವಂತ ಕೆಲಸವನ್ನು ಯೋಜನೆ ಮಾಡುತ್ತಿದ್ದು, ಜೊತೆಗೆ ಸಮುದಾಯದ ಪೂರಕವಾಗಿ ಹಲವಾರು ಕಾರ್ಯಚಟುವಟಿಕೆಗಳು ನಡೆಸಿಕೊಂಡು ಬಂದಿದೆ ಎಂದರು.
ನಗರಸಭೆಯ ಪೌರಯುಕ್ತ ಶ್ರೀಕಾಂತ್ ಮಾತನಾಡಿ, ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ವತಿಯಿಂದ ಡಾ.ವೀರೇಂದ್ರ ಹೆಗ್ಡೆಯವರು ಹಳ್ಳಿ ಹಳ್ಳಿಗಳಲ್ಲಿ ಕೂಡ ಬಡತನವನ್ನು ಹೋಗಲಾಡಿಸುವ ನಿಟ್ಟಿನಲ್ಲಿ ಇಂತಹ ಕಾರ್ಯಕ್ರಮವನ್ನು ಮಾಡಿದ್ದಾರೆ ಎಂದರು.
ಕರ್ನಾಟಕ ಗ್ರಾಮೀಣ ಬ್ಯಾಂಕ್- ಮಳ್ಳೂರು ಶಾಖೆಯ ಪ್ರಬಂಧಕ ಎಂ.ಸತ್ಯನಾರಾಯಣ್ ಮಾತನಾಡಿ , ಪ್ರಗತಿ ಸ್ವ ಸಹಾಯ ಸಂಘಗಳಿಗೆ ಆರ್ಥಿಕ ಅಭಿವೃದ್ಧಿಯೊಂದಿಗೆ ಸಂಸ್ಥೆ ಬ್ಯಾಂಕ್ ಮೂಲಕ ಒಪ್ಪಂದ ಮಾಡಿಕೊಂಡು ಸದಸ್ಯರಿಗೆ ಪ್ರಗತಿನಿಧಿ ಸಾಲ ವಿತರಣೆ ಮಾಡಿ ಸಾವಿರಾರು ಕುಟುಂಬಗಳು ಇವತ್ತು ಉತ್ತಮವಾದ ಜೀವನ ನಡೆಸಿಕೊಂಡು ಹೋಗಿರುತ್ತಾರೆ ಎಂದು ಹೇಳಿದರು.
ಈ ಸಂದರ್ಭದಲ್ಲಿ ತಾಲ್ಲೂಕಿನ ಯೋಜನಾಧಿಕಾರಿ ಸುರೇಶ್ಗೌಡ.ಎಸ್, ಕಚೇರಿ ಹಣಕಾಸು ಪ್ರಭಂದಕ ರಾಘವೇಂದ್ರ, ಕಚೇರಿ ಆಡಳಿತ ಪ್ರಬಂಧಕರಾದ ನವೀನ್ ಹಾಗೂ ಕಚೇರಿ ಸಿಬ್ಬಂದಿಗಳು ಉಪಸ್ಥಿತರಿದ್ದರು.
