ತುಮಕೂರು, ಸೆ.9: ಊರುಕೆರೆಯ ಜೈನ್ ಪಬ್ಲಿಕ್ ಶಾಲೆಯಲ್ಲಿ ಮಕ್ಕಳಿಗೆ ತುಮಕೂರು ಜಿಲ್ಲಾ ಅಗ್ನಿ ಶಾಮಕ ದಳದ ವತಿಯಿಂದ ಮಕ್ಕಳಿಗೆ ಅಗ್ನಿಯಿಂದ ಸಂಭವಿಸಬಹುದಾದ ಅನಾಹುತಗಳ ಬಗ್ಗೆ ಜಾಗೃತಿ ಮೂಡಿಸುವ ಕಾರ್ಯವನ್ನು ಪ್ರಾತ್ಯಕ್ಷಿಕೆ ಮೂಲಕ ವಿವರವಾಗಿ ತಿಳಿಸಿಕೊಡಲಾಯಿತು.
ಜೊತೆಗೆ ಮನೆ, ಕಛೇರಿ, ಶಾಲೆ ಮತ್ತು ಇನ್ನಿತರೆ ಸ್ಥಳಗಳಲ್ಲಿ ಅಗ್ನಿ ಅನಾಹುತಗಳು ಸಂಭವಿಸಿದರೆ ಅದರಿಂದ ಪಾರಾಗುವ ಬಗ್ಗೆ ಮಕ್ಕಳಿಗೆ ತಿಳಿಸಿಕೊಟ್ಟರಲ್ಲದೇ ಅಗ್ನಿ ಅನಾಹುತ ಸಂಭವಿಸಿದಾಗ 101ಕೆ ಡಯಲ್ ಮಾಡುವ ಮೂಲಕ ಅಗ್ನಿ ಶಾಮಕದಳದವರಿಗೆ ವಿಚಾರವನ್ನು ತಿಳಿಸುವ ಬಗ್ಗೆ ಅರಿವು ಮೂಡಿಸಲಾಯಿತು.
ಆಕಸ್ಮಿಕವಗಿ ಅಗ್ನಿ ಸಂಭವಿಸಿದಾಗ ಮೊದಲು ಮಾಡಬೇಕಾದ ಕಾರ್ಯ, ಅಗ್ನಿಯಿಂದ ಗಾಯಗಳಾದರೆ ಅದಕ್ಕೆ ಯಾವ ರೀತಿಯಾದ ಪ್ರಥಮ ಚಿಕಿತ್ಸೆ ಮಾಡಿಕೊಳ್ಳಬೇಕು. ಅಗ್ನಿಯನ್ನು ಯಾವ ರೀತಿಯಾಗಿ ನಂದಿಸಬೇಕು, ಅಗ್ನಿಯಿಂದ ಸಂಭವಿಸಬಹುದಾದ ಅನಾಹುತಗಳು, ಅಪಾಯಗಳ ಬಗ್ಗೆ ಮಕ್ಕಳಿಗೆ ಜಾಗೃತಿಯನ್ನು ಮೂಡಿಸಲಾಯಿತು.
ಅಗ್ನಿ ಯಾವ ರೀತಿಯಲ್ಲಿ ಸಂಭವಿಸುತ್ತದೆ, ಅದನ್ನು ನಂದಿಸುವುದು ಹೇಗೆ, ಅದರಿಂದ ನಾವು ಪಾರಾಗುವುದು ಹೇಗೆ, ಯಾರಿಗೆ ನಾವು ಈ ವಿಚಾರವನ್ನು ಮೊದಲು ತಿಳಿಸಬೇಕು ಎಂಬ ಅಂಶಗಳನ್ನು ಅಣಕು ಪ್ರದರ್ಶನದಲ್ಲಿ ತೋರಿಸಲಾಯಿತು.
ಅಣುಕು ಪ್ರದರ್ಶನ ಮತ್ತು ಜಾಗೃತಿ ಮೂಡಿಸುವ ಕಾರ್ಯಕ್ರಮದ ನಂತರ ಅಗ್ನಿ ಶಾಮಕ ಸಿಬ್ಬಂದಿಗಳಿಗೆ ಶಾಲಾ ಸಿಬ್ಬಂದಿ ವತಿಯಿಂದ ಧನ್ಯವಾದಗಳನ್ನು ಅರ್ಪಿಸಿದರು. ಶಾಲೆಯ ಮುಖ್ಯ ಶಿಕ್ಷಕರಾದ ಸುನೀತ ದಗ್ಗಲ್, ಬಸವರಾಜು, ಪೂರ್ಣಿಮ, ನೇತ್ರ, ರಶ್ಮಿ ಸೇರಿದಂತೆ ಶಾಲೆಯ ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿ ವರ್ಗದವರು ಉಪಸ್ಥಿತರಿದ್ದರು.
